Әрі мұнай өндіреді, әрі білім береді

Ұңғымаларды ғылыми-зерттеу өндірістік жұмыстары цехының басшысы Айдын Қожаш әр вахта ауысымнан кейін университетке асығады. Білім ордасында оны машинажасау факультетінің студенттері күтеді. Өзіндік оқу бағдарламасы арқасында мұнайшы-педагогтің дәрістері ұзаққа созылып, қызықты өтеді. Ол теорияны практикамен шебер ұштастырып, студенттердің мамандыққа деген қызығушылығын арттырады.

«Білім беру – өте жауапты іс. Сондықтан дәріске кірісер алдында қобалжу сезімі болғанын жасырмаймын. Дегенмен бәрі ойдағыдай жүзеге асып келеді. ҚБМ мен университет басшылығының сенімін ақтап, студенттерге сапалы білім беруге тырысамыз. Еліміздің мықты жастарын тәрбиелеуге үлес қосып жүргенімізге өте қуаныштымыз», – деді Айдын Қожаш.

Ал №1 мұнай өндіру цехының геологы Бағдат Қойлыбаев магистранттарға сабақ береді. Философия ғылымдарының докторы болашақ ғалымдарды заманауи әдістеме бойынша оқытады. Олардың дәрісі соңғы әлемдік стандарттарға сәйкес өтеді. Сабақ барысында «Кен орындарын игеру» бағыты бойынша арнайы бейнематериалдар көрсетіледі, пікірталас ұйымдастырылады.

«Бізге осы саланың басы-қасында жүрген мамандардың сабағы өте қызықты. Олар Қазақстанда да, шетелде де мұнай-газ ісін оқыған. Сабақта түрлі мысалдар келтіріп, бүкіл әлемдегі кен орындарында жұмыстың қалай жүргізіліп жатқанын әңгімелейді», – дейді студенттер.

Мұнайшылардың білім алушылармен өзара байланысы екі тарапқа да оң нәтиже беріп жатыр. Студенттер үздік мұнайшылардан дәріс алады, ал қаражанбастықтар өзінің ғылыми және педагогикалық қырын дамытады. Айта кету керек, бұл меморандум аясында жүзеге асырылып жатқан алғашқы жоба емес. Аталмыш жұмыстар алдағы жылы да жалғасын табады.